新世界發展（017）主席鄭裕彤又有新搞作，佢今次唔玩認購新股，而係吼隻銷售男裝底褲同服飾嘅百富國際（8272）。噚日據聯交所資料顯示，彤叔上個禮拜四（15號）用周大福名義，以每股1.7蚊，買咗由百富大股東陳婉芬配售嘅1.1億股，涉及金額1.87億銀。家陣彤叔持有5.5%百富。
睇番資料，除咗彤叔，賭王何鴻燊四太梁安琪都喺10月底，用1.87億銀認購咗5.5%百富。彤叔同四太孖住入股，睇怕唔係睇中百富啲男裝內衣褲。
百富上個月中嘅通告話，同第三者楊俏蘭訂立備忘錄，計劃收購楊氏旗下喺大陸嘅製藥同相關業務，原來公司玩轉型搞製藥。嗱，𠵱家啲投資者好精，唔係你話轉型搞藥，我就要信，家陣有富豪入股，仲要係精靈嘅彤叔，博得過，所以上個禮拜，公司股價一度急升17%。

食髓知味再聯手

彤叔同四太唔係第一次拍住上，早喺05年初，彤叔、四太再加埋華置（127）大劉劉鑾雄，就曾經入股濠賭股結好控股（064），消息傳出幾日後，結好曾炒升倍半。兩人食髓知味，嚟緊百富股價應該會有睇頭，不過近排大市咁牛皮，成交金額急跌，彤叔同四太都要發多啲功，催谷吓百富喇！

百富易手繼續炒

百富國際本嚟由林麥集團（915）大股東王祿誾揸住，佢一心想學利豐（494）併購擴張，百富呢間英國品牌Byford亦係咁收購返嚟，主要產品係男裝內衣褲及織襪。今年7月，王祿誾同兩個董事將股份賣咗畀UpperRun嘅主要股東陳婉芬。
呢位陳小姐係一位成衣貿易商，40幾歲，做咗貿易及管理成衣業務超過20年。自佢收購後，百富復牌股價喺一日內飛升3.8倍。不過升勢仲未完，主權易手後繼續再炒，由7月復牌當日嘅0.48銀，到噚日收報2.16銀，股價飆升3.5倍。
電郵：mailto:[email protected]