經恒地李四叔點名推薦後，碧桂園（2007）嘅新股認購熱爆全城，閣下抽唔抽得中，今日就會知，華華噚日喺網上四圍走嘅時候，發現唔少人討論碧桂園，其中有一個題目最吸引華華注意，有個網友babiland，喺《香港討論區》問大家，有冇收到電話，話有人個身份證號碼同你一樣，叫你fax身份證影印本去確認？babiland話自己同另一個網友mami都收到，係個女人打嚟嘅，講嘅嘢差唔多。

鑑於早排差人至拉到一班盜用人哋身份證嚟認購新股嘅詐騙集團，而且以前都未聽見過有咁嘅事，於是大家都有啲驚，諗會唔會又有新嘅詐騙集團呢？
嘅然係咁，就等華華幫大家調查吓究竟係咩事啦。經過華華個同事一輪查問，又打電話問碧桂園嘅過戶處卓佳，佢哋執董兼投資者服務主管唐冠良承認，卓佳的確係有職員打過電話畀認購人。
之但係，咁唔代表呢班認購人已經抽中，只不過喺分配抽籤前，職員發現佢哋嘅申請表資料填得唔係咁清楚，所以好心咁打個電話畀呢幾位申請人，叫佢哋畀個身份證副本睇睇，對清楚啫，若果有關人士唔信或有懷疑，應該打返電話去卓佳覆查。哦，原來係咁，相信各位申請人個心都定番啲，下次再有咁情況，大家知點做啦！
[email protected]