去年大陸官方因不滿美國喺韓國部署「戰區高空防禦系統」（THAAD，又稱薩德），靜雞雞啟動限韓令，趕絕韓國娛樂公司、明星、製作人到大陸搵食，所有網站連舊韓劇都要下架，之前韓國明星拍嘅廣告一樣唔俾播，搞到原本喺大陸好火嘅韓流即刻死晒。不過韓國新總統文在寅上台後，積極想援和同中國關係，聽聞都收到成效，o依家一啲大陸網站又有舊韓劇上返架。

據大陸知情人士講，今年會唔會全面撤銷限韓令，相信機會唔大，因為中國官方都好強硬，一日唔解決薩德系統問題，韓國藝人要去大陸搵食都好難，不過o依家官方放緩咗限韓令，網站可以播下韓劇，只係回應下韓國新總統釋出嘅善意。