舊年以姊妹檔推出水着寫真嘅歐氏三姊妹歐詠怡、歐詠寶同歐詠珊（新聞連結： https://bit.ly/2kJdNfi ），今日喺灣仔為越南餐廳開幕擔任嘉賓，佢哋話平日都好鍾意食嘢，分別最拿手煮西餐、甜品同泰國嘢。

歐詠怡指歐詠珊食極唔肥，佢就笑謂：「我平日都好為食，不過夜晚8點後就唔食嘢，唔食宵夜真係好緊要。」不過佢哋就直言喺屋企會互相引誘對方「破戒」，歐詠怡話：「會引大家，不過佢哋會提我好肥，要減。」歐詠寶仲話自己一食宵夜就肥20磅，真係好誇張。

歐詠怡嚟緊就會單飛出歌，7月就會發佈新歌《愛神箭》，歐詠寶同歐詠珊就喺大陸拍完杜琪峯嘅電影。另外，歐詠寶仲啱啱為短片擔任女主角：「係警匪片嚟嘅，我做個女警。雖然唔使打，不過要揸槍又要追逐，我平時真係冇乜運動，之前拍追逐戲嗰陣都仆親。」

精選娛聞，喺晒《娛果》
http://fb.com/appledailyent