楊崢同黃宗澤（Bosco）呢段「姊弟戀」快來快去，早前網上雖然流出兩人咀嘴照，可惜隨住楊崢臭史越揭越多，再加上Bosco已收回仿古車，楊崢亦以私人理由，向商台無限期停工，令宗崢戀劃上句號。而上星期楊崢出席活動時，就封嘴避談，只係強顏歡笑，Bosco早前出席澳門活動時，就表現忟憎，仲話：「俾條路行下……」﹑「俾啲空間啦﹗」

這邊廂Bosco同楊崢段戀情斬纜，那邊廂Bosco舊愛胡杏兒，今午竟然高調地喺微博貼咗張攬仔照片，仲留言話：「我找到了﹗」兼擺咗三個心心符號，似向Bosco示威，相中杏兒瞇眼﹑一臉冧樣攬仔，但就睇唔到該男人容貌，唔少粉絲喪留言話祝佢幸福﹑又話希望呢張相唔係劇照喎。

至於日前同杏兒去韓國嘅胡定欣，今日拍廣告時，被問到該男子係咪杏兒新歡，定欣維護好姊妹：「我唔講，你哋自己問佢，我費事拆穿佢。」咦﹗似乎真係有啲嘢咁喎！

令人疑惑嘅係，早於本月1號，已有網民喺明洞影到胡杏兒與好友胡定欣及黃智雯行街街相，但該名網民指李思捷都喺度，但張相就見唔到。難怪今日杏兒一po呢張相之後，即有網民問佢:「李思捷？」下？李思捷有「好好好好朋友」春卷(即王寶寶)同「好好好好好朋友」陳雅倫，日前喺對方生日P上，更獲陳熟女胸頂送暖喎!

好亂呀!