無綫新聞經常被批評是是但但，令到觀眾離棄，早年開始星期六同星期日嘅《六點半新聞報道》，已經試過跌到得番單位數收視。估唔到上星期一至五嘅《六點半新聞報道》，亦跌至近年新低點得番單位數，根據最新收視報告顯示，無綫上星期一至五嘅《六點半新聞報道》平均收視只得9.7點，即係只有63萬觀眾，比之前一星期跌咗3.2點，流失咗約21萬觀眾，真係慘不忍睹。

至於夜晚7點播嘅內地劇《三生三世十里桃花》，亦同樣收視慘淡，平均收視得12.7點，約82萬5千觀眾，比對上一星期流失咗16萬9千觀眾。至於之後播出嘅《東張西望》、《愛‧回家之開心速遞》同內地劇《射鵰英雄傳》同樣收視插水。