舊將張家瑩（現改名張珮汶）出席新亞視開台記者會，宣布自己嫁得出嘅喜訊：「我結婚喇！最快明年年底舉行，要籌備好多嘢。」

今次重返娘家，張家瑩主持逢周四晚播出《今晚見》節目，主要講旅遊同飲食：「我同幟哥（餐廳老闆黃永幟）、向海嵐、王喜一齊做，呢個係全新組合，覺得幾得意，加上係live，搵我呢，可能本身我有餐廳，加上之前喺亞視主持好多旅遊節目，去過好多地方可以分享。」

問到怕唔怕冇糧出？張家瑩表示：「有糧出，我有信心㗎，返到嚟好開心，感受到嗰份溫馨，頭先踏入會場好緊張，知道好多舊同事返嚟亞視，見到大半個場嘅人都係識嘅。」今次重返娘家，張家瑩係簽部頭合約，問到酬勞係咪比以前好？佢坦言：「係呀，多㗎，非常之滿意，希望同公司建立良好關係。」講番當時亞視熄機，張家瑩都有喊，佢話：「今次開機咪笑囉，我唔喊啦，大個女，希望有更好發展。」

更多娛聞，喺晒《娛果》
http://fb.com/appledailyent