反送中運動1周年，不少藝人因黃藍政見不同而有所抒發，但前港姐歐陽巧瑩「政見」與大台不同，多次在個人平台公開發聲及撐黃店，今年3月約滿後已狠撇大台，而老公「木偶哥」林師傑疑因她的關係被投閒置散成透明人，只剩做《勁歌金曲》主持，昨日他更被證實死約完後，遭大台棄用唔續生約。

今日，歐陽巧瑩就在社交平台再出帖文，貼了一張藍天彎月的圖片，指這一年自己喚醒了，亦發現香港大部份藝人在平行時空，更列出了3個原因：「第一，真係有一大部份係政治冷感，你有你哋抗爭，佢有佢哋繼續飲紅酒，佢哋只係知好多黑衣人破壞交通同社會安寧；第二，香港根本冇artist，冇屬於香港嘅artist，由97之後根本冇所謂嘅香港artist，歌影視都係睇住某國市場去做，香港得個幾百萬人，點夠十三億收視重要，一場運動，你都可以知道香港人其實係幾有才華，根本唔輸任何一個東南亞國家，咁點解自九七回歸之後香港嘅娛樂事業停濟不前？原因唔係因為我哋做唔到高質素嘅作品同Artist，而係為咗迎合某國嘅水準而令到我哋嘅質素不能夠上升；第三，香港冇artist發聲嘅原因，係因為大部份artist都係人，都係打份工，佢哋都有自己嘅生活要負擔，少啲勇氣都冇可能發聲。」

歐陽巧瑩再指出自己不想再做藝人，除了因為厭倦，更看到藝人被外來因素去強迫迎合所謂嘅『市場』，更寄語大家要支持本地藝術家，不要因失去才後悔，因為藝術品才是最能夠保留到當時文化及回憶，最後她說：「廣東話，香港，加油！」

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新