近排打開馬經版，最多人談論嘅係邊個邊個為15W達標而要追數，又或者方嘉柏起勢追住榜首蔡約翰，爭做練馬師王者，講嚟講去都係一個「追」字。以53W排響第三嘅告東尼，相差蔡、方二人6W，今季跑埋兩次就煞科，告仔想封王睇嚟要靠奇蹟出現，不過咪以為佢會放軟手腳，蹺埋對腳等唞暑喎！原來佢仲有任務在身，就係幫「逍遙駿將」追得一分得一分。按照馬會規定，到季尾唔夠21分嘅馬要淘汰出局，家「逍遙駿將」得19分，呢隻五班馬話晒都年輕力壯，無病無痛，周二出戰第二場五班1200米，執到個四檔好位，話唔定可爭取表現而逃出生天。呢朝「逍遙駿將」出內圈踱步，出去操嗰陣告仔睇住隻馬落隧道，咁緊張有啲嘢喎！