日本混血女星Becky年初被爆搭上樂隊極品下流少女嘅已婚男主音川谷繪音，醜聞令Becky形象插水，原本代言10個廣告同埋全部工作都被Cut，對於被《週刊文春》圖文並茂爆公開二人喺酒店房拍嘅自拍照，Becky立即開記招道歉話已經冇同川谷繪音聯絡，點知佢再衰多兩錢重，事後更被爆擘大眼講大話，《週刊文春》再爆Becky同川谷嘅LINE對話，指Becky喺開記招道歉前，仍有同川谷聯絡，仲講笑話要多謝《文春》令佢哋嘅戀情浮面，顯得毫無悔意。

川谷繪音已經同前妻離婚，最近被爆有個19歲新歡。至於Becky就事業面臨玩完，工作買少見少，不過佢最近為日本出版社寶島社拍攝一個新廣告，Becky剪短頭髮之餘，更冇着衫裸體露出玉背，登上今日報章全版，似乎係望以嶄新形象為事業重新起步，更透過今次廣告向傳媒及外界展露最赤裸一面為前事懺悔，可惜唔少網民都對Becky終極一脫唔多受落，唔止被彈毫無美感，更有人覺得有點反胃。