人有姓名，馬匹亦有本身名字。以往香港馬主幫名下賽駒改名，通常都比較文雅。
近年時代唔同咗，本地馬名隨住社會同文化轉變，明顯趨向口語化，唔再一味文縐縐，好似「點解」、「好靚仔」、「為食仔」、「識飛」、「贏到爆」、「急急腳」都係相當口語化而又有親切感之馬名。港澳馬壇上季甚至同樣出現同騎師有關之馬名，香港有隻馬叫「雷神」，澳門則有一匹叫「柏寶」之馬，幸虧兩駒都識贏馬，否則相關騎師真係唔得佢死！近日澳門馬名連中共國策都玩埋，有匹新入口自購馬以「一帶一路」命名，另外有隻新馬就叫做「土豪來了」，兩駒馬名夠潮之餘，仲有啲霸氣噃！