近年流行星二代，不少藝人的子女都入行，Chilam跟太太靚靚的囝囝慕童（魔童），雖然只有8歲，但他遺傳了父母的優良因子，很大機會在娛樂圈發展，但Chilam直言不太接受：「最好唔好啦，因為娛樂圈係好靠運氣嘅地方，自己好幸運，但呢個幸運唔係可以傳承，將幸運延續畀你，反而大部份時間、大部份人都係痛苦嘅，呢個係金字塔遊戲，頂層嘅人好少。」

Chilam坦言就算囝囝遺傳二人的演戲細胞都沒用，觀眾太喜歡標籤，他說：「標籤咗你係星二代，條路係會難行100倍，作為父母做到嘅係畀好好教育你，戲子並唔係一個咁引人入勝工作。」但他坦承假如兒子將來要入行，自己未必反對得來，他說：「我係好開放嘅家長，𠵱家提完你去做功課，你唔去都奈你唔何，我唔可以用藤條喺側邊提你，但當你入咗呢個工業，如果好沮喪，好失落，或者唔係你想像中咁fair，我提過你喎，已盡番自己做父母責任。」嚴父背後，Chilam笑笑口透露囝囝表述過的理想職業，到目前止已超100萬樣，所以擔心還是太早。