今晚《星期六主場》請來黃秋生任嘉賓，講咗好多精采之語，依家fb亦已經廣傳。主持人劈頭就問佢，話:「王維基問大家，香港電視不獲發牌，灰唔灰？咁你灰唔灰？」秋生謂:「我著眼點唔係喺灰唔灰度，而係究竟有冇清楚交代點解唔發俾佢。佢哋講呢個係一個機密，唔講得，但呢個唔係喺香港地層核爆，有咩咁機密？喺公開、公平嘅自由社會，大家都可以嚟投資，你一定要話俾人知，下一次可能係有非洲人嚟開電視台，或者香港另外有人想再開台，你都要話俾人知個標準係乜嘢。」

秋生又提到，周邊地區電視台獲政府支持，而且人才輩出、出國學習後將新知識融入當地電視業，自然有進步，但香港面對越來越寡頭壟斷、如何發展？「佢哋鍾意點就點0架喇。」佢又笑指每一代人的標準都不同，正如佢嗰代要求字正腔圓，但依家啲後生仔講嘢又急又快，咬字又唔清，佢根本聽唔清楚對方講咩，秋生話:「但我個仔聽得明喎。」又笑言依家好多人批評電視節目水準:「批評都係一種娛樂。好似內地劇咁，越多人批評，越多人睇。其中一種娛樂就係俾你鬧。」

秋生表示，早前無綫斟其合作，拍劇或主持飲食節目，但最後談不攏:「傾唔掂，因為佢配合唔到我要求一我要求realtime實時工作，佢哋做唔到；而且我要求優質食材，啲料要好靚嘅，佢哋做唔到。假嘅，拍出嚟全部假嘅。」佢又話:「你睇嗰啲飲食節目嗰啲人，通常都唔識煮餸，嗰啲亦唔會去煮餸0架嘛，佢哋用對眼食飽架嘛。教人煮餸嗰啲都唔識煮餸0架。」唔知May姐有冇份呢？哈哈哈哈哈哈!

訪問中，主持人係咁誘導秋生答問題，如秋生話有啲台佢一定唔睇，其實都知佢講亞視啦，但主持係都要問佢:「例如呢？」秋生話:「例如嗰啲不斷重播，播埋嗰啲咩留聲機，你睇到都火滾。」佢又話有時下午睇一啲清談節目，都令佢火滾:「訪問人嗰個，唔知點解要講國語，答嗰個又係咁樣答。做咩要講國語呢？基本上你兩條友都唔識講國語，睇嗰個又抓晒頭，由兩個唔識國語嘅人去主持國語節目，我覺得佢好silly。」秋生又謂，如果台前幕後都唔喺自己嘅專業上堅持，咁就算政府發多廿個牌都冇用，而且劇集節目質素亦永遠唔係好。