城市大學拒絕喺校內起緊教學樓二座嘅一班地盤工人入飯堂，俾人鬧階級歧視，為息眾怒，校方上周六喺地盤範圍搵咗兩間房，擺啲枱凳，加幾把風扇，整咗個臨時工人飯堂補鑊，但工人仍然覺得安排唔公平，認為咁樣都係將工人隔離。有學生就建議喺飯堂劃一啲位畀工人用膳。

學生有支持有反對

城大噚日特登請傳媒去未起好嘅教學樓，睇吓工人「用膳區」。入面有160個位，但設施同學生飯堂差得遠，對得大半個鐘食飯嘅工人嚟講，唯一好處可能係就腳。工人李生對安排好不滿，話「呢度又焗又熱，又冇水斟。食飯啫，又唔係阻你學習，應該互相遷就吓。」城大學生王同學亦唔介意喺飯堂劃啲範圍出嚟畀街外人食飯。不過，有同學認為飯堂座位唔多，唔畀工人用無可厚非喎。
城大發言人話，學生同教職員優先使用飯堂嘅條例存在多年，地盤承辦商都知，又堅稱冇派人趕工人走，工人「用膳區」唔裝冷氣係因為電壓等問題，仲話唔夠風扇可以加。教學樓工程要下年4月先完成，工人仲有排先可以脫離焗住開餐嘅日子。