無論特首林鄭月娥抑或特區政府官員，開口埋口都係大灣區。明嘅，習近平親自制訂嘅國策吖嘛，當然要大鑼大鼓推動以表忠，否則林鄭真係咁易可以「與習同行」？身在北京出席「中國發展高層論壇2019」嘅林鄭，噚日以英文演講時，離不開硬銷大灣區，甚至話相信大灣區城市群，有潛力成為「東方華爾街」同「東方矽谷」咁巴閉。雖然話擦鞋真係可以冇底線，但有科技界中人聽完就話，即使娥特要吹，係咪都要吹得唔好太離譜？

科技界笑一味靠吹

娥特席間形容大灣區嘅基建聯繫非常好，而喺世界保護主義抬頭下，大灣區涉及一國兩制同三個關稅區，正正係不同特色經濟體系合作嘅實際示範，偏偏佢就冇提，唔少港人對於被中央規劃下，香港一國兩制或受損幾咁憂心。佢仲話香港有世界級大學、法治以同知識產權嘅保護及國際連繫等，都係香港貢獻大灣區創科發展嘅優勢，相信只要配合香港自身嘅資本市場，大灣區城市群有潛力成為「東方矽谷」或「東方華爾街」喎！

有科技界中人聽到娥特咁講，笑住話原來只要靠吹就可以搞大灣區，佢話其他嘢唔講，單係大灣區冇互聯網、資訊自由流通，要吸引外國企業同人才已好麻煩，更加唔好講內地法制唔公平同唔透明，現在連香港都搞埋引渡條例修訂，莫講外資對大灣區有戒心，隨時連香港人都唔想嚟！

李八方