菊梓喬（Hana）噚晚喺無綫台慶頒獎禮憑《但願人長久》奪「最受歡迎電視歌曲」，但今日去到港台十大中文金曲頒獎禮就食白果，喺台下坐足全場，雖然冇獎，但尾聲時都有上台祝酒同大合照。

噚晚缺席無綫台慶頒獎禮嘅吳若希（Jinny），於Hana在大台得獎後喺Ig留言：「恭喜呀一姐」。點知就令兩邊fans罵戰。

Hana今日被問到此事，佢話：「我比較夜先睇到留言，多謝佢恭喜我。知道佢唔舒服，免疫力系統下降，自己以前試過生蛇，明白有病好唔舒服。」Hana話唔覺Jinny說話有骨：「佢其實好支持我哋。」又否認對方潤緊佢，Hana話：「點會，只係玩下，佢係真心恭喜，佢之後都出post話係真心。」佢仲話收到好多message恭喜，要覆到凌晨四、五點。

Hana話呢啲係網絡欺凌：「之前都有好多呢啲事情，作為藝人好多說話都要接受，認唔認同係另一件事。要承受任何人批評，大家都有自己嘅自由，但想大家都尊重番自己，尊重番人哋。之前有啲留言好過份，對我同Jinny都好過份。」

Hana為Jinny盡力兜，但谷薇同何雁詩都有留言「食花生」，問佢係咪同公司女歌手呷醋？Hana即成頭問號「嘩，有咁嘅事呀？」佢強調冇不和：「我諗都係講笑，多謝公司栽培，我用心做音樂，鍾意我嘅朋友請繼續支持我嘅歌。」

精選娛聞，喺晒《娛果》
http://fb.com/appledailyent