NBA禮拜六將公鹿中鋒蒙路（Greg Monroe）對騎士控衛戴歷路斯（Derrick Rose）嘅犯規升級做一級惡意犯規，雖然呢個遲嚟嘅決定唔會令到嚴重拗柴嘅路斯早啲好返，不過心理上應該點都好過啲。

路斯禮拜五晚喺騎士大勝公鹿116:97場波，喺一次上籃俾對手中鋒蒙路強行拉跌，落地後嚴重扭傷足踝。球證當時睇番錄影都維持原判，只係畀咗蒙路一個犯規，之後仲同騎士嘅教練團解釋，話蒙路「唔係有心犯規」。不過，NBA喺一日之後就推翻呢個決定，將蒙路嘅普通犯規「升呢」做一級惡意犯規，即係話蒙路今次嘅犯規動作係不必要嘅身體接觸。

路斯賽後曾經話「自己可能係聯盟入面唯一喺遇到呢種侵犯，對方都唔會獲得暴力犯規嘅球員」，當NBA做咗決定後，路斯話：「我唔認為自己講咗好多嘢，都係呻咗兩句啫，我連佢哋有無聽到我講嘢都唔知道。不過點都好，依家條氣點都叫順番啲嘅，至少聯盟係有留意到囉。」