飲食人誌：
茶餐廳賣平價潮泰菜不惜蝕本
茶餐廳是香港典型的飲食文化，無論食品和價錢，都是以平民化為主，但近年新開的茶餐廳，卻引入貴價食品，打破原有傳統之餘，食一頓餐蛋麵和奶茶竟要三十五蚊埋單。同樣經營茶餐廳的Bob認同要有新食物的想法，但價錢絕不可脫離茶餐廳的標準，他想盡辦法，希望做到高價貨、平民價、不蝕本的經營策略，結果成功殺出一條茶餐廳新血路！
記者：伍璇卓 攝影：陳陶鈞
開設平民化茶餐廳，一直是Bob的夢想，但他堅持想開一間與別不同的茶餐廳：平民化價錢再加埋提供潮、泰式高質食物，看似相當矛盾，但他一直等待着機會。一天，他和好朋友說起這個理想，朋友正好是飲食集團的管理層，便商量如果有效運用飲食集團的資源，可創製出相信是香港唯一一間潮泰港式茶餐廳。
比其他菜館平一半
Bob本身是位廚師，曾任中、西和泰菜食肆，對於茶餐廳裏吃的文化，他有一番見解。「自己最鍾意食，將唔同嘅飲食文化引入茶餐廳，都會幾得意，喺價錢大眾化嘅條件下，會有更多人願意試食，作為一個飲食工作者，睇到咁多人食自己嘅嘢，真係好開心。」
由於背後有飲食集團的支持，Bob將廚師和資源重新調動，將正宗潮式和泰式食物價錢，調低至坊間其他菜館的一半。一隻斤多重的泰式咖喱炒蟹，只賣$78，價錢是其他泰式食店的一半。相對於本身集團旗下著名的露天泰式菜館，一樣的材料，一樣水準的廚師，已經便宜了四成。
賣蝕本雞在所不惜
Bob的茶餐廳，有潮式、泰式和港式食品，為了做到最好，他特地由集團的中式和泰式餐館，抽調地道頂級廚師到茶餐廳主理，將食物的水準保持在最高水平。「有咗呢班廚師，另一個最大嘅問題就係材料。開業初期，自己要到新界攞貨，同時又要喺區內搵供應商，真係有啲分身不暇。」
Bob笑說，茶餐廳要平民化，除了堂食外，外賣也是一個好方法，譬如那款魚露浸雞，堂食要$80一隻，但在下午四時至七時街坊買餸時段，外賣就$38一隻。「我哋用上新鮮雞，成本差唔多要35蚊，加上廚師人工同配料，38蚊已經要蝕本，但無所謂喇，賣得多，攞貨自然平，日子耐咗，就做到蝕本價都有錢賺，而且愈多人試到我哋出名嘅菜式，我就愈開心。」
10蚊碟打冷啱晒夜遊人
其實另一個平價方法，就是將份量減少一點，而價錢則調低一半。
「以潮州打冷為例，外面45蚊好大碟，但我哋就賣10蚊，份量少啲，好處係可再叫其他款式嘅食物，就算叫兩碟唔同款打冷，都係20蚊，總之客人唔會蝕底。加上入夜後唔會食得太多，賣咁大碟都無用。」
這個想法，源自Bob仍是一個單身漢。他愛吃，去到食店。總想多叫其他款式，但一個人根本吃不下。
「喺某啲食客嘅角度嚟講，錢唔係問題，但值唔值得先係一個問題。」
他認為亞洲地方菜中，潮州和泰國的食物最為配合。
「兩種地道菜都係酸而味濃，而且大多係同出一轍，好似潮州有鹹菜胡椒豬肚湯，泰國就有涼瓜白豆煲湯；潮州有明爐生魚，泰國就有明爐烏頭。將兩地菜合二為一，都唔會有格格不入嘅感覺。我哋就以呢啲口味，自創潮泰合一嘅食品，令人有新鮮嘅感覺。」
泰式咖喱炒蟹$78（比市價平$70）
必選過1斤生蟹
Bob指出要做最好的咖喱炒蟹，最重要是用大青蟹，但青蟹一定要新鮮，而且每隻要過一斤，才可用來做咖喱炒蟹，之後便找來泰國廚師阿柄主理。「平唔一定會蝕本，假如青蟹賣唔去死咗，就唔可以再用，就連拆肉做蟹肉伊麵都唔可以。死咗一兩隻，成本咪重貴？價錢平，賣得晒，薄利多銷先會賺錢。」
冬蔭方魚蠔仔粥$33（大）$23（小）材料塞爆巨碗
入口勁鮮，Bob重話係全港獨有。這碗粥用上蝦蟹等海鮮煲湯，再加入方魚和豬骨煮成的湯底，由於用料多，小記奉勸各位女士們，那個巨型湯碗材料實在太多，一般女士們叫細碗就可以。
潮州打冷每碟$10（一般打冷店每款$25）
豬紅鵝腸值得推介
一定要9點之後先食到，這些打冷材料是有三十年經驗的潮州師傅炮製，我推介其中的豬紅和鵝腸，夠爽口和彈牙。
肉碎炒二丁$26
份量加倍少酸辣
一般茶餐廳炒出前一丁，最平要$24元，但這個肉碎炒二丁，份量就是兩包出前一丁，再加上阿柄親自主理的泰式肉碎，少少辣味和酸，最適合呢個時候食，勁開胃！
羅宋湯通粉$16（連飲品）
湯渣都要食埋
說起羅宋湯，曾任廚師的Bob便會滔滔不絕：「要做一個好嘅羅宋湯，好難，要配合唔同嘅食物，又係難。有時候，部份菜料要炒過先會香口，但配合食麵或意粉，菜唔能夠太多……」單是理論已有一大堆，確實又與眾不同，我就連渣都食晒。
一致推介：炒丁麵
我唔食辣㗎，但個肉碎炒一丁真係好好味，其他餐廳炒出前一丁會用好多油，但呢度就夠乾身，好易入口……魚露浸雞好滑，一定要試個醬。
空氣流通防肺炎
在肺炎期間，「潮港泰」會打開極富歐陸風情的木窗，除可使空氣更加流通外，還有種外國風情感覺。而員工和廚師會戴上口罩，確保食物在製造和傳送過程中，保持絕對衞生。
潮港泰茶餐廳
電話：27061821
地址：將軍澳新都城中心一期商場地下G25、G26
營業時間：早上7點至凌晨1點