仲有兩個禮拜左右就生BB嘅王菲，近排繼續忙緊搞新居入伙事宜，雖然噚日係周末，但阿菲一樣好唔得閒，由於佢同前夫竇唯所生嘅囡囡竇靖童要上課外活動，所以就交由李亞鵬阿哥李亞偉、即係童童哎吔阿伯幫忙湊女，開車送佢到學校。
噚日中午十二點幾，同李亞鵬完全兩個樣、又凹又瘦嘅李亞偉揸住架保母車，喺王菲同李亞鵬嘅七千呎晴翠園新居開出，載童童去到朝陽區一間國際學校。九歲大嘅童童已經成形，眉眼似足竇唯，鼻嘴就似媽咪，當時佢着住全身白色運動裝、戴住太陽帽，落車時手上仲拎住支類似棒棒糖嘅食物，同同車一個細路女喺車旁玩咗一陣之後，就一齊行入學校，臨走時，佢仲舉起隻手同李亞偉講拜拜㖭。

王菲做柴可夫

兩個鐘後，李亞偉又到場接童童返晴翠園，直至四點零鐘，肚大如籮嘅王菲就親自做柴可夫，揸住部Audi載童童同工人去現居嘅麗高皇府，引來八部採訪車尾隨追訪，有記者為影王菲，竟然揸迎頭車同王菲部車平排而行，都咪話唔驚險呀。而麗高皇府嘅保安員見大批傳媒追住王菲，即時落閘放狗，驅逐記者離場。
Textby關仁