分析師T之公子，以前就讀英童學校，成績爆晒燈，既然讀書咁叻，分析師T乃不惜腰間錢，送個仔去英國讀寄宿名校；去到英倫，成績更醒，有資格入選精英訓練營。最近叻仔返香港放假，預備提前回英，接受隔離十日之後就入訓練營，點知學校打電話嚟香港：「對唔住，無論點樣，你位公子唔可以入營，以免影響其他學生、家長情緒不安！」
細路仔上咗一課，知道何謂歧視。沙士病都算害得我哋慘矣，生意冇晒，大人生活失常，學童學業亦受打擊。分析師T惟有安慰兒子，入唔入營全不相干，最緊要自己努力。

財務M聽到，即刻話：「如果唔高興，可以返嚟香港讀。據我所知，國際學校學位以前爭到打崩頭，細路未出世就要報名排隊。點知沙士一打到嚟，好多expat家庭家屬急急回鄉，好多學位冇人要，各位兄弟如要送子女入讀國際學校，正好趁手，因住蘇州過後冇艇搭。」
分析師T位公子既然去咗英國，就唔會吼香港嘅國際學校，反而其他老友記重可以考慮。不過中途插班（即唔係自小入讀），要小心子女追唔上英文程度，衍生挫折感！不可不知現時知名歷史名校嘅平均英文水平，差過以前，各位學生入到去淺水灣國際學校，有排追。寫到呢度，醒起一位讀者問子女在港讀完中五中六先申請美國大學，還是移民過去留班讀中學。左丁山以為到美國留班唔着數，最好就係以本港中五中六成績申請入社區學院或者大學。