今日大除夕，吳君如繼續為佢嘅首次執導電影《妖鈴鈴》四出宣傳，晏晝君如就單拖去到旺角戲院進行謝票，著住道士袍帶住黑眼鏡同觀眾玩遊戲送福袋兼大合照。君如接受訪問時話呢兩個星期已經差唔多走勻成個中國，風塵撲撲，君如今日露出倦容，佢話：「走咗好多城市，有時夜晚都唔知自己喺邊度瞓覺，今日把聲都有啲唔舒服，宣傳埋香港最後一站，終於可以休息吓。」

講到電影上映後喺大陸票房強勁，但反觀香港票房就認真麻麻，君如話：「香港真係麻麻地，我諗係正常嘅，始終有好多因素，可能聖誕檔期比較多西片又有英雄片，大家習慣咗聖誕睇西片過年就睇返港產片，其實我原本諗住喺鬼節上添不過趕唔切，我覺得檔期其實冇乜所謂，亦都唔會失望。」

對於自己第一次執導，自稱為小學雞導演嘅君如話已經好滿意成績，會唔會已經開始籌備下一部？佢話：「再睇吓先，等我休息吓搵吓靈感先，都要睇吓市場。」

成個聖誕假期都忙住宣傳電影，囡囡有冇投訴？君如話：「我今日同佢講『媽咪做埋今日宣傳今年嘅工作就完喇』，點知個女反我眼話『今日咪今年最後一日囉，梗係完啦』。」君如笑言囡囡轉數好快：「希望遺傳到我啦，自己好似轉數越來越慢。」

【minigame】2017瘋暈人物 返工打機唔使擇日
http://bit.ly/2CeWQkP

更多娛聞，喺晒《娛果》
http://fb.com/appledailyent