「我覺得自己有過度活躍症㗎，由細到大都坐唔定。」點解今年30歲嘅林顥伊、即係麗新集團主席林建岳嘅千金，咁樣話自己？「因為我彈琴唱歌跳舞游水騎馬滑雪乜都要學，成日要有刺激先至滿足！」又係噃，睇返顥伊（其實佢以前叫愛兒）少女照，確實各式活動相都有齊，跳跳紥嘅佢細個原來想做歌星，點估到女大十八變，家陣幫爹哋打理家族生意？

對住過度活躍嘅學生，老師可以點？小學至中二讀女拔萃嘅顥伊笑笑口話，「好啲嘅咪讚你『活潑好動』囉」。佢話小一、二時上堂唔專心，成日撩同學傾偈，「覺得係直升（中學），所以唔覺太大壓力」。升中後好啲，集中喺課堂外先繼續發揮佢無窮無盡嘅精力，但參加嘅活動都收之不盡，運動場上極易搵到佢影蹤，同時又會參加音樂表演等，係咪動靜皆宜？「我鍾意乜都試下。」

五兄弟姐妹中佢排第三，自覺個性較獨立，「哥哥同家姐會打交，細嗰兩個又會，我喺中間吖嘛，單獨啲比較獨立啲囉，哈哈！」諗返兒時往事，顥伊不時發嘻嘻笑，仲自爆一度諗住做歌星，「彈琴唱歌我都識，幾有天份㗎，想發展下」，可能因為屋企有搞娛樂事業（爺爺林百欣曾經係亞視老闆），接觸得多就對做歌唱行業有憧憬，仲試過參加校內talent show做戲，「有時啲課外活動都係減壓方法」。

中二後佢去咗美國讀寄宿學校，like爆當地自由學習氣氛，「12個人圍住張枱上堂，唔係死讀書，大家會討論」，尤其佢鍾意體育，當地咁重視亦好啱佢。顥伊之後先後獲港大工商管理學學士學位、英國BPP法學院之法律深造文憑同中大普通法法學碩士學位。

家陣從商，開始搞多咗社區事務，除咗加入爹哋所屬嘅經民聯，亦成立非牟利組織Paws Hero，爭取動物權益。佢話自細都好鍾意狗仔，留學美國時都有狗狗相陪，返港後20歲買人生第一隻狗，家則養緊4隻，周末假期會帶佢哋去picnic，或者逛下提倡人狗同行嘅Mikiki，「香港應該開放多啲空間畀寵物，我之後都會繼續爭取。」