英鎊昨日驚見9算，今日則企穩10算水平，身邊朋友紛紛盤算是時候去英國旅行，又或者趁平買定啲鎊投資。不過，恒生銀行投資服務首席分析員溫灼培認為，如果要去英國旅遊的話，愈遲買鎊愈著數；相反，如果手上持有英鎊的投資者，就好趁英鎊兌美元反彈至1.3早走早著。

溫灼培指，英國脫歐公投牽連甚廣，加上英倫銀行行長己表明，夏天會採取減息行動，換言之最快下周四或8月會議後有機會淌息，據利率期貨統計顯示，下周英倫銀行減息的機會率高達77%。長遠來看，因現時英國44%出口往歐盟，一旦脫歐就要與其他國家做生意，所以壓低貨幣增加競爭力在所難免。他預料，英鎊兌美元有機會下試1.25，甚至1.2水平；加上蘇格蘭亦有機會再獨立公投，種種不明朗因素下，投資者千祈不要現價追鎊。

另一方面，港人最關注的日圓繼續狂升，今日每美元兌日圓已達101水平，以港元計貼近7.7算。溫灼培指，如果未來幾個月要到日本旅行，就好買定啲YEN，因為現時歐洲笠笠亂，日圓作為避險資產，資金將會繼續泊入，所以有買趁手喇。

掌握財經生活資訊，即Like「蘋果ATM」fb專頁啦！
http://fb.com/appledailyatm