「阿嬌」鍾欣桐嫁杏有期，噚晚佢同「阿Sa」蔡卓妍一齊喺紅磡出席「微博之夜」，仲夾晒一齊着黑色裙。阿嬌話婚後，Twins一定唔會拆伙，阿Sa話：「人生會有唔同階段，唔會因為佢結婚就唔做Twins。」阿嬌補充：「冇理由公司阻我生仔，生咗繼續做。」

阿Sa話自己都有生小朋友嘅畫面，但現在忙拍劇，所以都係隨緣。阿嬌即講金句：「你估生twins就個個生twins架咩？！」阿Sa解讀﹕「我哋叫twins唔通真係生twins咩。」

問到確實婚期？阿嬌表示未來幾個月都要開戲，仲要去美加做巡迴演唱，所以都要等埋師傅揀好日子，但伴娘就預咗一定係阿Sa。咁婚禮有idea未？阿嬌百無禁忌咁話﹕「Michael(賴弘國）都send咗啲相俾我睇，中間有個亭，全部都係紅色花，好似好恐怖，似鬼新娘咁。」阿嬌透露一定會喺香港擺酒，反而台灣就未必，只會同親戚一齊食飯。」

精選娛聞，喺晒《娛果》
http://fb.com/appledailyent