「念念不忘，必有迴響」，正是因為香港觀眾念念不忘，令「衝奧」有望嘅《一代宗師》美國版，香港上映有望喇。

《一代宗師》喺第86屆奧斯卡獎獲最佳攝影同最佳服裝設計兩項提名，導演王家衛就話：「電影世界只有一種語言，就是以心傳心，取得第86屆奧斯卡最佳服裝設計及攝影的提名，這不僅是香港電影的光榮，也是對所有香港電影工作者有所堅持的肯定。」

《一代宗師》為香港電影殺入奧斯卡開創「零的突破」，而且仲係一嚟就有兩個提名，成績驕人。之不過，影片報名參賽時，係用「美版」，唔係香港版，即係之前靜靜雞喺香港迷你戲院UAMegaBox好低調咁上咗幾日嗰個版本。有幸喺大銀幕前欣賞到108分鐘美版《一代宗師》嘅，可能得百幾人。

既然依家《一代宗師》「衝奧」有望，電影公司亦宣佈安排108分鐘美版《一代宗師》香港上映，到時會否再掀熱話呢？一定會。之不過……順帶問下，麥浚龍嗰部《殭屍》兩小時導演版幾時有得睇？