【新增內容、新增照片】
真人版電影系列《銀魂》導演福田雄一，今年將漫畫家西森博之嘅經典作品《今日我至叻》（又名：我是大哥大）拍成日劇，由賀來賢人、伊藤健太郎、橋本環奈、清野菜名、城田優、太賀、鈴木伸之、磯村勇斗，吉田鋼太郎及乃木坂46成員若月佑美等合演，開播後反應不俗，在口碑帶動下，加上最後一集邀來堤真一及山崎賢人客串，大結局昨晚播出錄得12.6%收視，創下開播以來最好成績，比上集10.8%升達1.8%。

同福田導演合作《齊木楠雄的災難》嘅山崎賢人，更喺劇集尾聲嘅彩蛋中壓軸登場，一身臭飛look扮演新大佬，fans紛紛在網上留言話唔夠喉，希望《今日我至叻》能夠添食，更令山崎賢人於Twitter一度登上最熱門關鍵詞榜首。其實呢部原作從80年代連載至1997年，單行本推出18本共累積4,000萬銷量，日劇版導演福田雄一今日為滿足劇迷，公開山崎賢人同主角們拍攝時嘅花絮照片。

精選娛聞，喺晒《娛果》
http://fb.com/appledailyent