曾經要求區議員去廁所都要登記嘅沙田民政專員、被議員形容為「地區皇帝」嘅陳婉雯，唔使再喺今屆立法會選舉做刀手咯。政府今日（14日）宣佈，發展局首席助理秘書長（工務）黃展翹會接任沙田DO，明日履新。

早喺2018年新界東立法會補選期間，陳婉雯已經幫政府做刀手，DQ咗時任社區網絡聯盟劉頴匡及沙田區議員陳國強嘅參選資格，又喺民主派光復區會後隱身，當班區議員冇到。

就算區議員成功開到會，多多規矩嘅「地區皇帝」對班區議員都諸多挑剔，唔畀平反六四、唔畀作政治表態、拒絕為反修例運動嘅死者默哀等。當然唔少得嘅係，連班區議員開會都要登記，問准咗佢先可以去廁所，真係嚴過班學生哥上堂，要舉手同miss講去廁所。

俗話有云：「新官上任三把火」，唔知一眾沙田區議員對換刀手點睇，會唔會有新嘅部署？沙田區議會副主席黃學禮就同八方講，佢都係睇政府新聞稿先知陳婉雯調職，更加唔識邊個係黃展翹。至於會唔會搵埋一班區議員傾吓部署？黃學禮就話相信無論邊個做DO都好，都只會係幫政府做「白手套」，原則上唔會有大改變，睇定啲先喎。

到底「地區皇帝」調職去邊度？政府新聞稿冇講，唔知係咪又升官發財？至於2002年加入政務職系嘅黃展翹，曾於多個政策局同部門工作，包括民政事務局、運輸及房屋局、保安局、政務司司長辦公室、前中央政策組等等。

-----------------------------
反送中一周年，《蘋果》整理大量涉及警察濫暴濫權等資料，製成詳盡資料庫，請按此閱讀圖表版本 ／純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多