扒龍舟唔容易，平時操練都好鬼緊要，否則點會個個龍舟健兒手瓜都起晒𦟌。民主黨一班「真兄弟」有「手腕」，卻無手瓜得鋪蠻勁，連續第三年參加大埔龍舟賽，年年成績都唔標青，志在參與，輸完又玩過。佢哋組成「民主龍」噚日參加大埔區龍舟男女混合賽，比賽前集訓咗六次，每次扒足個幾兩個鐘，但白鴿始終唔熟水性，最終都係不敵其他大隻佬同大隻女，八隊中排第六，即係尾三衝線。隊長任啓邦話，其他參賽隊伍個個都係專業扒手，佢哋業餘，預咗輸，加上扒咗一次初賽已經好攰，決賽扒到中間已經冇力。佢仲笑笑口話，佢同前副主席陳竟明都負重磅，壓住條船快唔到，唔減肥下年隨時包尾。