回顧過去恒指9RSI升到遠高於80嘅話，就證明個市好到不得了，稍後就會出現RSI頂背馳，反映股市仲有得繼續升。不過，最近港股就相反，噚日又跌467點，恒指超賣完可以再超賣，9RSI跌到落去14.1。晉佳認為，可以睇成升市頂背馳嘅相反版本，嚟緊將出現RSI底背馳，換言之，恒指超賣反彈過後，會再嚟插過。
回顧2011年8月初，歐債危機拖累港股急跌，6日跌足3,333點，9RSI最低嗰日跌到12.9，呢個已經係對上一個超超賣嘅劇本，而呢次8月初跌完後，反彈番跌浪嘅一半，去番接近21000，9RSI去番略高於50嘅中軸，之後9月又嚟急跌，跌到16170至嚟見底，第二浸跌幅相比第一浸更慘烈。
至於𠵱家呢轉又點樣？恒指由5月20日高位23512開始下跌，就當噚日低位20652見咗短期低位，都唔見咗2,860點，當恒指跟住反彈番去跌勢一半，上番22000，之後再插嗰轉多過2,860點，未來幾個月都有機會下試19000。

劇本係咪照炒就得？又唔一定噃，如果幾間主要央行諗到條絕世好橋出嚟救市，就有可能由跌市變番做升市，情況一如07年8月出現嘅「大奇蹟日」，之後嘅發展就唔需要再花咁多口水去講。講到尾，去到呢啲緊張關頭，最重要睇番消息面，冇好消息，就冇得傾。
不過，短線嚟講，既然恒指進入超超賣，要博反彈，原則係即使買入之後股價仲未見底，但跌完之後再反彈，都肯定可以番到自己買入價去沽貨，令自己喺恐慌性買入情況下，可以立於不敗之地，坐和望贏。
噚日就有近期連插嘅頁岩氣股拗腰反彈，個別本地地產股走勢都好番少少，咁今日又可以博乜？
水泥股、航空股都算係較好嘅選擇，當中對安徽海螺（914）比較感覺良好，9RSI得番9.5，呢隻水泥股之霸，品質最優良，斷估點都唔會輸死啩，望就望佢可以反彈一成。

晉佳

本欄逢周一、三及五刊出

蘋果互動，是蘋果日報與讀者緊密互動，放料及收料的聚腳地。
http://on.fb.me/14ZZe5m