日本偶像組合AKB48成員入山杏奈，14年5月喺握手會上被狂迷持刀襲擊，遇襲後令佢玉手留有疤痕，入山一度要包住右手，手指更無法如常郁動，好似舉V及寫字都有困難，好彩目前情況已明顯轉好。

現年21歲嘅入山杏奈，出道逾5年終於獲安排推出個人寫真集《美麗的罪》，鐵定本月22日上架，今日就公開大膽封面照，仲為寫真集簽名，見佢已可以如常拎起支筆，令粉絲終於放下心頭大石。入山於去年11月為寫真集到台灣取景，分別以水着、內衣等造型上陣，寫真內會大方展示玉手，今次佢半裸拍攝封面，並露出事業線，入山一招輕咬玉手施展誘惑風情，佢自己都對呢個封面感到滿意。