【李八方online】林鄭「剋星」命格 習大大幾時割席自保？
蘋果日報 2020/02/13 17:40
梁振英習近平中聯辦張曉明林鄭楊天命王志民何志平中聯辦主任張曉明降職
堪輿學家楊天命早前都忍唔住冒險向中共國家主席習近平上書「進諫」。
小明突然由港澳辦主任淪為「庶務課」主管，圈內人一睇都覺得羞辱味甚濃，以前叫慣小明做主任嘅茶水阿姐，他日面對呢位管理日常事務嘅「直屬」上司，情何以堪？
而呢次小明調任，政圈花生友又再一次諗起，特首林鄭月娥似乎真係「剋星」。堪輿學家楊天命早前都忍唔住冒險向中共國家主席習近平上書「進諫」，話林鄭個直屬上司一係身體出事，一係難逃下台命運，甚至有牢獄之災，即係唔會有好下場，唔該炒咗佢魷魚就算。楊師傅所言非虛，單計林鄭上任特首後，先有中聯辦主任王志民被燉冬菇，後有港澳辦主任張曉明降級做「大打雜」，真係好邪！
林鄭未做特首前，2006年擔任民政事務局常任秘書長，上司係何志平，肥平去年因行賄而被美國聯邦調查局起訴，被判囚3年並罰款40萬美元。其後林鄭2012年升任政務司司長，上司梁振英被中央DQ，未能連任特首，更被傳媒踢爆在任時收取澳洲公司UGL 5,000萬元。
至於不斷講支持林鄭嘅習近平都受牽連，林鄭一手搞出嘅《逃犯條例》修例，波及中美嘅貿易談判，殺傷力不可謂不大。而反修例風波仲有餘波，國際社會對制裁違反人權嘅香港同北京官員都上晒彈，有花生友話林鄭為習大大帶來嘅禍害仲未見底，而武漢肺炎已經令中國喺國際間備受壓力，習大大都面對好多暗湧，如果相信楊師傅所言，似乎習大大應該及早「割席」，免令自己他日都出事。