馬國明今日喺旺角出席打機活動，佢喺現場打機，但佢話已好耐冇打，間中睇外甥仔玩，覺得遊戲世界好吸引，而自己冇同黃心穎一齊打機。

之後馬國明主動澄清噚日講頒獎禮嘅「陪跑論」，佢話：「我講領跑員嗰樣嘢，好似寫到人哋好渣、我叻咁，我唔係咁嘅意思，我想話我o依家參加頒獎禮嘅心態就好似個領跑員咁，好享受去玩去跑，但係獎項嚟講我開始冇乜感覺，尤其係呢一、兩年，我係享受演嘅過程，邊個贏輸對我嚟講真係冇乜感覺。我睇到報道仲要key個太陽眼鏡喺袁偉豪面上，千祈唔好曲解，唔好代入任何人落我嘅比喻上，邊個攞獎都冇所謂，怕袁偉豪睇到唔開心。」而佢透露《降魔的2.0》將會原班人馬拍攝，亦會加入新角色，「石敢當」將會以另一身份亮相。

提到聖誕節唔可以出埠，馬國明想做多啲商業演出，而佢未買禮物俾黃心穎，問佢會唔會送戒指？馬國明話：「又嚴重咗，未傾到呢啲問題（結婚），呢啲要講timing。」

精選娛聞，喺晒《娛果》
http://fb.com/appledailyent