Hotcha成員張惠雅（Regen）剛啱踏入30歲，佢決定做一件轟轟烈烈嘅事情----就係一個人去西藏旅行。

Regen雖然細細粒，但膽子真係好大，揹住個差不多半個人咁大嘅背囊，今早由香港出發坐火車去廣州，由廣州東站坐的士去廣州火車站，再轉火車到拉薩，點知過程就遇到好多阻滯，Regen喺ig發長文講述驚險過程。佢話﹕「你以為著晒Tee，著晒棉褲入面仲著條孖煙通，沖晒涼，洗曬頭，就可以舒舒服服上火車54小時，就可以好嘆好乾淨咁瞓係張床到？sorry，永遠都唔會有咁順利嘅事發生係我身上。」

原來Regen買咗11:45火車去拉薩，預早9點半到達廣州，食完早餐差不多11點去取車票，點知就出事故喇！Regen話﹕「取票處個職員見我用passport買飛，就叫我拎入藏紙。但我做晒功課，香港人係唔需要入藏紙，所以我好肯定咁話一定唔需要，但係佢好堅持唔出票俾我，嗰時已經差不多11點10分，最後我嘅堅持下，佢叫我去售票廳問可唔可以拎，唔ok就退票，唏噓。」

由於車站到售票廳有一段距離，Regen揹住個大背囊左穿右插，其間仲要扮可憐樣叫人讓路，但職員起初都係話唔得，Regen再用好肯定語氣話「唔需要」入藏紙，職員先入去問問，原來真係唔使，咁先出到票俾佢，但搞完一輪已經11點半，Regen自爆「底褲都濕曬」即飛奔趕上火車。

但故事仲未完，因為Regen誤以為可以霸晒個車廂，除晒底褲同Bra之際，突然有個阿叔敲門，佢話﹕「原來係一個阿叔同我同廂，真係嚇到我褲都著唔切。不過那個阿叔唔係普通嘅阿叔，散發出一股親和力嘅氣質，原來佢係西藏人啊。係啊，呢張相係佢影嘅。」唔少網民都話﹕「阿叔，好幸運呀！」

在此都要祝福一句﹕「Regen，旅途小心呀！」

精選娛聞，喺晒《娛果》 http://fb.com/appledailyent