當年今日

熾熱消費:
鬼片熱潮恐怖LEGO乘機推出

蘋果日報 2002/07/10 00:00


近排興起一片鬼片熱潮,特別多鬼片上映,靈異海報周街貼,膽小啲都嚇親。唔單止鬼片熱潮返咗嚟,就連驚嚇玩具都乘機大賣,其中LEGO更推出首個恐怖STUDIOS系列,幽靈、科學怪人、吸血殭屍全部出籠,等你知道積木都可以好恐怖。

記者:張穎倫
攝影:黃子偉、陳智良
ImageBoy:仇峻坊
瘋狂實驗室科學怪人研製成功
喺一個月黑風高嘅晚上,一個瘋狂博士同埋冇腳女鬼、白衣幽靈喺佢嘅古堡兼實驗室入面,成功製造咗一個力大無窮嘅科學怪人。不幸嘅係一個西裝骨骨嘅阿John,竟然誤闖呢個既陰森又機關重重嘅恐怖古堡,究竟佢能夠逃出生天,抑或成為科學怪人嘅點心,就由你哋做導演決定。


醒目資料
今次LEGO推出的恐怖STUDIOS系列,並無推出拍攝鏡頭,除咗瘋狂實驗室附有CD-Rom外,如要玩拍攝效果,就要用上集侏羅紀系列推出的組件,才可自拍好戲!
狄古拉伯爵吸血復活
當你闖入呢個滿布蝙蝠嘅地窖,你會發現地窖一邊設有樓梯、一邊裝有升降台,雖然四周都滿布火把,但都極之陰森,行近一啲會見到一個古怪僕人推住一架木頭車行嚟行去,行埋去就會見到車上裝有一副棺材。千祈唔好打開呢副棺材,因為當你一打開,長眠已久嘅吸血殭屍狄古拉伯爵就會乘機復活,隨時將你嘅鮮血吸乾吸淨!


兇狠人狼四出擄劫少女
據講每當月圓之夜,唔少偏僻村落都會有少女無故失蹤,而且每次失蹤之前村民都會聽到一陣陣令人毛骨悚然嘅狼叫。究竟失蹤事件同傳說嘅人狼有冇關係?西裝骨骨嘅阿John又可唔可以憑住佢架有型吉普車,拯救呢位少女呢?


積木版盜墓迷城
沉睡於古埃及金字塔中嘅法老王,雖然肉身已經枯乾,但唔知係唔係因為有盜墓者嘅出現,竟令佢突然從墓中爬出來。唔單止咁,喺墓中另一邊嘅白骨精亦都有蠢蠢欲動之勢,究竟佢哋係一山不能藏二虎,定係攜手對付人類呢?


其他驚嚇玩具
骷髏頭拔蘭地
細個見到婆婆支老鼠仔酒,已嚇到目瞪口呆。若果今時今日見到呢支以骷髏頭浸成嘅拔蘭地,包保你會魂不附體。酒樽內唔單止有恐怖骷髏頭,而且更會發出詭異叫聲,再加兩眼發青光,睇見聽見都不禁令人毛骨悚然。
鬼頭四圍跳
玩法雖然同傳統嘅泵氣玩具一樣,但一按即跳嘅再唔係可愛青蛙同馬仔,而係呢個披頭散髮嘅核突鬼頭。每按一下就會擘大口跳一跳,疏落嘅頭髮又會跟住飄起,若然夜晚見唔到有條線拖住的話,一定會畀佢嚇親。
魅魑魍魎恐怖袋
一個漫無目的,但頭髮蓬鬆嘅骷髏頭,竟然黐住個恐怖袋不斷亂跳。最恐怖係亂跳時更會發出淒厲叫聲,雙眼又發出深深紅光,宛如地獄惡鬼纏身,真係心血少啲都俾佢嚇傻。
入貨點:

玩具反斗城
(27309462)
尖沙嘴海運大廈地庫032舖

Rose
(27429818)
荔枝角香港工業中心C座地下世紀廣場G室