時尚界新寵林愷鈴（Ashley）挾着是龔慈恩女兒之名進軍娛樂圈，邊上學邊探索圈中生活。今年18歲的她還未嚐過初戀滋味，但她並不抗拒拍拖，希望找到一個有才華兼幽默的男士，能夠一擊即中找到最愛，白頭到老。

Ashley自從今年升讀港大建築系後，要同時兼職娛樂圈工作密密接job，無論品牌開幕、MV女主角、電影、廣告代言，都見到這位星二代的蹤影，她都享受其中。早前Ashley在柴灣影樓拍攝化妝品牌短片，大晒18歲青春無敵加遺傳媽咪的靚樣，向來都想做歌手的她，更為廣告創作了主題曲《Perfect the way I am》，帶出自信和自主精神，感覺舒服自然。

18歲還未拍過拖，Ashley坦言期待緣份到來，她說：「拍拖同友情、親情一樣，係雙方要經營嘅關係，如果我冇時間，不如處理咗手頭上嘅嘢先，有時間付出多啲，咁會好啲。」看來她是容易投放所有感情的人，對此她說：「梗係希望第一次就白頭到老㗎啦！媽咪喺感情生活動上教我要雙方付出、體諒、要平衡，所有關係都係咁樣。」談到擇偶條件，她表示沒有rules，高大靚仔並非最緊要，她說：「我比較欣賞有才華同幽默感的男仔。」

Ashley畢業於聖保羅男女中學，國際預科文憑（IB）考獲41分，正就讀港大建築系一年級，加上樣子標致，琴棋書畫瓣瓣掂，比起其他星二代起步快，難怪她也說自己投對胎。其實龔慈恩百份百支持囡囡入行，對於囡囡的任何選擇都永冇say no。Ashley有自己的思想，現階段正處於摸索期，真正目標是想成為歌手。因為媽咪拍戲出身的關係，Ashley經常都會探班順便偷師，母女感情好到不得了！提到現在有不少收入，Ashley說：「我嘅時間管理同理財都係麻麻哋，成日都好大頭蝦，所以金錢上係由媽咪處理，佢點處理就唔知，不過我好信任佢，到o依家我都係問媽咪攞零用錢。」

撰文：羅慧敏
攝影：葉君海

更多娛聞，喺晒《娛果》
http://fb.com/appledailyent