當年今日
關於我們

  發叔打高球最精神 - 李八方

蘋果日報 2002/01/01 00:00


啱啱嫁完女嘅外父,女兒喜事翌日有咩節目?原來劉皇發昨日一早(真係好早──係清晨六點)就去咗深圳打高爾夫球。八方真係佩服發叔咁好精力,皆因星期日由上午十一點註冊搞到深夜十二點送客,發叔都由朝企到晚,不過發叔的朋友話,其他事未必有精神,但打高爾夫球發叔幾早都會彈起身。
八方覺得發叔嫁女當晚實在太興奮就真,因為自己請咁多位政商名人,特首畀面捧場,李麗娟更上台致辭,大讚發叔識教女,Virginia「幼承庭訓」好孝順。女家咁巴閉,男家亦唔輸蝕,請來政務司司長曾蔭權兩夫婦。新郎Randy余漢坤同八方講,煲呔曾同余爸爸是多年老友,自己讀小學就認識煲呔,當時煲呔重未結婚。Randy更加當住八百賓客,話呢日結婚好似中狀元咁開心,冧到Virginia甜到漏。
前晚劉皇發嫁女,李麗媚贈興,猛讚發叔識教女,睇見新郎哥滿意笑容,呢頂高帽發叔應受之無愧。


E-mail:[email protected]