去年憑拍片唱粗口版《PPAP》走紅嘅黃建東，睇佢扮嘢搞鬼睇得多，最近終於有套「正經」劇出街，佢喺大台網劇《降魔的番外篇—首部曲》中飾演發明家「高古尼」，唔少人都大讚佢表現，亦為佢「終於做番個正常人」而開心。

黃建東今日孖住劇中拍檔楊潮凱上大台節目受訪，提到拍劇期間遇到靈異事件，之後佢接受《蘋果》電話訪問詳述話：「其實係3月中嘅事。我哋去咗西貢一個荒廢咗嘅酒廠度拍，我演嘅科學家，發明咗一個捉妖app，劇情講我要用個app，喺荒山野嶺講『降魔伏妖Attack！』嘅對白，地勢環境係一個荒廢酒廠，隔籬係個山坡，完全冇人嘅，每次我講完嗰句對白呢，我就聽到啲敲鐵通嘅聲音，最初聽到我覺得有啲奇怪，點解有聲嘅？」

黃建東自言起初都冇為意：「但每次一講句，就會聽到啲敲鐵通聲，我哋每個人就開始驚，因為啲聲好得意，唔會重疊住我啲對白。我見導演明明戴住個headphone，之後都放低咗，潮凱同我對緊戲，我覺得唔舒服，潮凱咬緊牙關，想快啲拍完快啲走，當時已經係半夜12點幾1點。」

更恐怖嘅仲未到，黃建東話：「最恐怖係第二日我哋再開工嘅時候，收音師先話俾我哋聽，裏面係收到小朋友嘅聲音，但係我哋成個劇組都係冇小朋友，係一個小朋友都冇！而我哋拍攝嗰個酒廠對面，係有個放細路仔骨灰嘅龕堂。」黃建東話可能係佢哋拍嘢時「嘈」到佢哋，所以對方以鐵通聲回應。而自從嗰日之後，劇組開工都會拜神。

黃建東話以前聽過啲前輩講，話拍嘢會遇到，但估唔到今次係咁近，佢話：「我哋諗住呢套劇都係只講啲妖魔，唔係真係好講鬼㗎嘛！講啲靈界嘢，冇諗過咁樣都會招惹到。不過我又覺得平生不作虧心事，同埋我哋之後拍嘢時都會『打聲招呼』，但當時拍嗰陣真係好唔舒服，有少少想暈嗰種感覺。」

講到套劇出咗街，坊間反應如何？黃建東話：「Feedback OK呀，佢哋話好鍾意，之前我喺《降魔的》演嘅角色有戀物癖，有啲留言話戥我開心，唔使再做變態佬、終於演番個正常人，哈哈！同埋因為今次第一次擔綱主演，所以其實拍嘅時候都好大壓力。」

更多娛聞，喺晒《娛果》
http://fb.com/appledailyent