英國傳媒噚日確認，高路普已經同利物浦簽咗約，英國時間今早10點將以紅軍主帥身份見記者。據報高路普想用番自己人做助教，但外界估計點都有一位紅軍名宿加入教練團，究竟會搵夏文、希比亞定謝拉特返嚟呢？

勢炒羅渣士舊部

《天空體育》噚日晏晝率先確認高路普已經同意簽約三年，仲喺噚晚嚟到利物浦，據講年薪450萬鎊（約5,330萬港元），而德國《圖片報》嘅講法就多啲，有1,000萬歐元（約8,760萬港元），但呢份德國報章話雙方談判一直有少少分歧，例如紅軍想留用麥阿里士打做一隊教練，高路普就想帶多啲自己人，想炒晒麥阿里士打、奧迪斯高、基斯戴維斯同埋連達斯呢四位羅渣士時代嘅球隊教練。佢仲強調唔要轉會委員會，要對轉會有絕對話事權；但《每日鏡報》就話佢同意轉會委員會繼續存在，我求大俠真係唔知邊份報紙講得啱，留番佢自己解畫啦。
不過，外界期望高路普點都會搵一位紅軍名宿入教練團做盲公竹，候選人可能包括希比亞、科拿同夏文，甚至係踢緊洛杉磯銀河嘅謝拉特。科拿已經開腔講明恨做，等高路普召喚；而希比亞勝在經驗豐富，做過主教練；夏文就同高路普同聲同氣，大家都係德國人。雖然未有消息話紅軍想斟謝四返嚟做助教，但《每日鏡報》話銀河方面已經好擔心謝四突然掛靴返母會。

承諾微調夠攞前四

另外，《每日鏡報》仲披露咗唔少高路普同紅軍高層嘅談判內容，例如高路普話上任後唔會大換血，會以現有陣容為骨幹，再喺冬季轉會窗買少少人做微調就搞得掂，相信已經𠱁到班高層好開心；佢仲承諾利物浦今季可以重返前四，下季再踢歐聯。翻查以前啲報道，高路普教多蒙特嗰陣，已經好想簽賓迪基、羅拔圖法明奴同奧歷治，仲視賓迪基為羅拔利雲度夫斯基嘅接班人；如今三個心頭好喺晒利物浦，難怪佢會咁滿意紅軍嘅現有陣容。