十．一黃金周期間，強國人依舊湧港，周末嘅旺角多人到令人躁底，走入新界區更加以為自己番咗大陸。
事實證明，黃金周前炒一轉本地零售股係冇錯。當然時裝王國I.T（999）之前炒起後已回吐，不過據I.T近期動作，翻身故事或有續集。
I.T近年業績的確強差人意，早排轉季清貨，最癲時期一件三折，買夠三件仲有得再折，平到嚇死人。明明香港各大商場銷售都有增長，但點解I.T偏偏受惠唔到，5月底止首季香港銷售仲可以大跌一成？
首先大家要認清I.T嘅定位係潮，只要買啱貨，理論上潮人可支持業績。問題係𠵱家公司乃以代理日本品牌為主，咁就出事啦。𠵱家連日本人都會追韓星，更何況係香港人？韓流早已撼贏日本，時裝界亦早已吹「韓風」。
近期似乎醒覺自己Out咗，識得引入韓國少女品牌Stylenanda。比較令人意外嘅係，I.T代理埋呢個品牌旗下嘅平價化妝品牌3 Concept Eyes，據講售價同網購差唔多，相信呢個品牌可成功吸引妹妹仔嘅注意。
眼見莎莎（178）、卓悅（653）越做越大，今次I.T正式涉足化妝品業務，或者會為股價帶來新嘅幻想空間。

Fifi
本欄逢周二、四刊出

足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24