在大陸工作期間,認識好多內地人都好有興趣嚟香港玩,其實佢哋好多都知道香港實在冇乜特別好玩,但係都好想嚟,主要原因有兩大個:1.購物。所以非常希望香港嘅零售業商人及服務性行業從業員老老實實好好工作,千祈千祈唔好抱住一個一劑過大批羊牯排隊落嚟俾你搵笨實嘅心態,否則壞聲譽一傳十、十傳百,大陸同胞唔再嚟買嘢,喊都無謂。2.睇明星。成日聽到內地人問在香港是否經常在街上可看見明星,這也難怪,我哋成日見慣見熟唔覺矜貴,但對一個住在北京鄉村的小個體戶,睇見偶像確係一件大事。
上海係中國嘅金融中心,唔係香港;北京係中國嘅政治及文化中心,唔係香港;上海係紐約,北京係華盛頓,咁香港係乜?其實香港最有資格做洛杉磯,做一個ShowBusiness、潮流及蒲嘅中心,要做洛杉磯,最緊要保持「型」嘅形象,多戲拍及持續性製造新明星。政府其實可考慮唔知點樣吸引內地大明星在港置業,屆時全國明星都聚在香港,儼如東方比華利山,於是香港才可以在一塊大土地上有了特色、有了個性。