【利字當頭】強迫金送中屠宰記（利世民）
蘋果日報 2020/06/15 18:09
強積金MPF利世民利字當頭
利世民：大家都唔再信呢個政府係為香港人服務；利益輸送，分別只係送去邊度。
聽到有政客話：「不如將強迫金收歸中央管理，咁咪可以降低管理費囉。」點解嘅？點解有人會咁諗嘢嘅？
首先，表明立場：「還我血汗錢。」自古以來嘅明訓係：「親生仔不如近身錢，最敗家就一定係Other People's Money。」政府連派錢行政費都高過人，點解幫人管退休金可以低行政成本？嗱，正路計，畀你中央屠宰，結果政府都係招標Beauty Contest攞幾間國際投行圍標，然後，然後便沒有然後。「投資回報唔理想呀？唔關我事㗎」。「嫌收費貴呀？有既定招標程序，係咁㗎啦」。
「利世民，乜你諗嘢咁正路㗎！」我知，大家梗係諗中央屠宰強迫金，最終都一定會送中；2019年之前，我都會話：「冇咁肉酸啩。」今時今日呢，我信喎，再賤格啲都做得出。
「再殘格啲？例如呢？」例如規定迫金要買入特定比例嘅特定資產，尤其係DIS。呢類財富再轉移嘅手術，真係連法例都改埋，你都唔知。共產，唔通又會同你傾過先做喇喎，梗係唔會喇。所以我成日都同的人講，你今日將強迫金轉晒做美股又點？轉身射個三分波，話香港太多人嘅強迫金分布太過側重某啲嘢，要rebalance，得唔得？你反對喇，你吶喊喇，無人會聽到㗎。
香港人，何以，又憤怒，又恐懼？大家都唔再信呢個政府係為香港人服務；利益輸送，分別只係送去邊度。記得十幾年前我哋一班人反對強迫金，只有好少數嘅朋友支持，其他填鴨式教育嘅產品就話：「政府都係為咗大家嘅退休生活做準備啫。」點解佢哋會信政府係真心為市民㗎呢？「你知啦，真係有啲人唔儲錢，諗住老來就攞福利。」係呢，所謂嘅福利開支，有冇少到？政府有冇將啲錢好好咁用？唔好自己呃自己，好冇？如果有人唔儲錢，佢死佢折墮佢事，但點解要我哋陪埋一齊被剝削？
「唔好咁極端啦。政府嘅原意好好㗎。」原意？喂，強迫金推行咁多年，都唔駛講原意啦，講現實好冇？實情係呢幾個月，好多人飯都冇得開，供落嘅強迫金就係咁蝕，公平咩？我未聽過強迫金基金經理輸錢畀人炒，你聽過未？
利世民
-----------------------------
-----------------------------