一個晚宴，竟然可以講足一個星期，都算厲害，皆因每圍都有各自的故事。好似馬丁李柱銘咁，佢嗰晚出席大曾宴會嚟遲一步，發覺位都冇埋，立法會同事譚耀宗好客氣，話要讓坐，馬丁當然婉拒，最後加多個位，佢老哥坐喺中銀新貴和廣北同周一嶽局長中間，陳太就坐馬丁對面，同吳光正坐。
八方問馬丁，有冇覺得陳太心情靚靚，佢話冇，因為坐得太遠，冇機會傾偈，陳四萬之所以心情好，一說佢早前北上受到好高規格接待，中方重專登發咗佢同統戰部長劉延東嘅合照畀大家登，可惜好多傳媒都漏招。

徐四民客氣

另一枱嘅余若薇大狀，佢話自己當晚唔算太早亦唔算太遲到，有一半人自行入坐，俞宗怡係主人家，所以一早坐好，對面坐咗徐四民，俞小姐右手面空住，但係李業廣已經坐喺左手邊，按禮貌右手應該留畀上賓，所以余大狀走到徐老身旁坐低，徐老平日好惡死，但係當晚好客氣，重同余大狀講，現在個世界屬於年輕人，言下之意唔知係咪話自己已經老，唔再理世事，係就好啦。
余若薇圍枱都安排得好有學問，佢旁邊個位好多個人都坐過，先有鳳凰衛視嘅劉長樂，佢喺度滿場飛，結果單仲偕、吳清輝、吳康民都坐過，後來中聯辦副主任黃鳳超坐錯枱，搞到大家以為唔夠位，最後當然俾人請到第二枱繼續飲。至於徐老，一聽完曾副主席演講，就離席回家休息去也。


爆料熱線：29290000、27860099
報料傳真：26239278
報料電郵：[email protected]