當年今日
關於我們
【精靈上身】比卡超伊貝Switch特別版主機 11月16日推出
蘋果日報 2018/09/12 00:03
任天堂
Switch
Pokemon
精靈寶可夢
任天堂將會在11月16日推出連特別版Switch主機的《精靈寶可夢 Let’s Go!》套裝。
任天堂早在5月底時,已發表融合手機遊戲《Pokemon GO》玩法的Switch遊戲《Pocket Monster Let's Go!》,近日就再公開遊戲特點同發售日期,當然亦有為這款大作公佈附上遊戲的同梱版主機。這款同梱版Switch主機用上灰配黃設計,底座上以左伊貝、右比卡超設計,連機背都有伊貝及比卡超剪影圖案,加埋左右Joy-Con都跟返伊貝同比卡超的顏色(不同的黃色),外觀都確實幾醒目。但跟機遊戲方面就可從「伊貝」版或「比卡超」版二者中揀其一,玩法都差不多,只是主角同伴會變成伊貝或比卡超,兩款小精靈都各有獨特招式幫主角過關,要伊貝定比卡超,睇你選擇啦。
遊戲套裝將會在11月16日推出,除主機及遊戲外,亦會跟上方便在遊戲中捉精靈的精靈球。今次香港任天堂都跟得好貼,亦會同步在11月16日推出這個遊戲套裝,但譯名方面因要跟返官方名稱,所以會變成《精靈寶可夢 Let's Go!》,而「伊貝」亦會成為「伊布」,「比卡超」亦會變成「皮卡丘」,遊戲內的字幕亦會譯成中文。香港任天堂未公佈行版價錢,但日版方面,每款遊戲定價5,980日圓(約$422),而同梱套裝則定價37,980日圓(約$2,680)。
記者:布偉倫
搶先睇全新GadgetGuy專頁|fb.com/gadgetguy.appleseed/
特別版Switch機背亦甚有睇頭,印有不少比卡超及伊貝的剪影圖案。
行版遊戲將會用上中文官方譯名「伊布」及「皮卡丘」。
與比卡超成為同伴才能使出的搭檔招式「滔滔衝浪」,有機會令對手陷入麻痺狀態。