李冰冰今日喺銅鑼灣出席瑞士名錶寶齊萊專門店開幕，同品牌合作嘅太子鐘錶老闆鄧鉅明夫婦亦到場主持開幕。

冰冰心情好靚，訪問時大部份以廣東話對答，仲話自己都鍾意廣東話同廣東歌。依家冰冰已經進軍荷李活，唔係講英文多啲咩？佢話：「大家可以做見證，我從小唔識英文，慢慢學，好似學廣東話咁。」

講起學英文，問到佢拍攝《極悍巨鯊》（The Meg）時男主角Jason Statham有冇教吓佢？冰冰話：「如果拍戲，由朝到晚腦子裏面都係英文，小時候冇學英文，依家要用雙倍時間練習。佢（Jason）真係好好人，冇架子，好nice，有一次佢主動叫我練習一次，太好嘞。做完一次，我問佢可唔可以多練幾次，佢話冇問題，仲話如果要佢去學中文係冇可能，所以佢好理解，大家嘅關係非常好，佢哋對我特別照顧。」

冰冰仲開心提到《The Meg》片票房高達5億美元：「我們沒有預期咁高票房，導演當我係小女孩，拍得好會抱一下、親一下，老外係咁樣，係禮貌。」期待拍續集？「可以啦！今次拍攝是辛苦的，因為我不熟水性，潛落6、7米深，又要有動作。」片酬會否加？冰冰就叫記者幫佢話事，又笑言：「係呀，值得！」

賺咁多，怕唔怕畀稅局追稅？一講到呢個話題，冰冰即轉認真mood話：「我會做合法的事情。」咁有冇留意范冰冰嘅稅項風波？冰冰即示意助手解圍，助手話：「唔好意思，唔回應。」冰冰仲話想同香港導演合作，問佢會唔會收平啲？佢就好霸氣咁話：「唔收錢，劇本好嘅唔收錢！」

另外，太子鐘錶老闆鄧鉅明夫婦就大讚冰冰好nice好靚女，鄧太戴住巨型鑽戒介紹話：「係鄧生兩年前送嘅結婚周年禮物，今日重要日子先戴出嚟。」鄧生話戒指14.88卡，寓意一世發達，鄧太笑稱：「佢好貪錢。」鄧生仲話下次會送夠24.88卡。

日前「山竹」襲港，鄧太大讚公司員工好盡責，佢話：「係香港人精神，好敬佩！我哋都有同員工講，返唔到工或遲到都唔緊要，都當佢哋返工。佢哋嚟到已經好感恩，最緊要大家開心。」