江若琳9月尾同脾氣火爆嘅大陸相聲演員曹雲金分手後，感情失意，但事業就有新去向，已有四年冇出唱片嘅佢，宣佈正式重返樂壇，下周三仲會推出國語專輯《江若琳 最好的時光》，近日力谷新歌《原來我還愛著你》，江若琳除咗創作新歌，自導自演呢齣音樂微電影，佢請咗曾演大陸劇集《梔子花開》演員唐曉天做音樂微電影男主角。

唐曉天喺戲中扮病人，由女友江若琳貼心照顧，佢哋扮一對小情侶，好有默契，江若琳又話：「我上個月先同曉天拍完大陸劇《梔子花開》，我哋戲中都係扮一對，拍戲過程中，我發現佢係一個特別有自己表演節奏嘅演員，基本上我決定要拍呢個MV時，佢就係我不二人選，老拍檔真係特別有默契。」

江若琳對呢首情歌特別有感覺，佢話：「相信每一段感情都有一個有效期，過咗期，走出咗彼此嘅世界，唔糾結、唔糾纏，各自安好，唔好去打擾，咁先係最好嘅距離。」當拍到一場生離死別戲時，江若琳仲一take喊爆，佢再話：「戲中嘅我睇到最愛嘅人快要離開好難過，又要喺佢面前若無其事，連哭都要有唔同層次，好似經歷咗一場倒數計時嘅愛情，情緒跟住難過起嚟。」