【韓流】靚媽較量! 35歲韓佳人晒腿撼31歲朴秀珍
韓佳人朴秀珍
韓國唔少人妻做完媽咪後,冇話變成黃面婆,身材仲keep到同未生前一樣,好似呢兩位靚媽韓佳人同朴秀珍咁,佢哋生完同未生前一樣樣,唔講都冇人知佢哋已經升呢做媽咪級。
韓劇《懷抱太陽的月亮》35歲女星韓佳人去年做咗媽咪,為老公延政勛誕下B女後,一直都未接新劇,但佢閒時都會拍吓廣告或影雜誌相,近日佢就為雜誌拍新照,當中今日更公開咗一張黑白照。照片中韓佳人穿上黑色透視裝,大騷美腿,性感得來又高貴。
至於同樣係靚媽嘅韓流始祖裴勇俊嘅31歲老婆朴秀珍,佢自從去年為老公誕咗B仔後,已經低調復出咗,不過佢就主要拍吓廣告同埋影吓雜誌相,暫時都未有新節目出街。