【新增G.E.M.回應】

鄧紫棋（G.E.M.）自從戀上王灝兒（JW）舊愛Mark Ngai，不停公開拍拖放閃，繼上月喺半島酒店嘆燭光晚餐，慶祝自己26歲生日，日前兩人又到銅鑼灣撐枱腳，被讀者白先生透過「爆相爆片」分享，G.E.M.同男友食飯前仲手叠手祈禱，G.E.M.一直都話要搵個有共同信仰嘅男友，Mark完全係佢杯茶。

讀者白先生喺電話表示：「嗰晚9點半，喺時代廣場食通天嘅芽莊，見到G.E.M.同佢男朋友坐隔籬枱，佢哋叫咗好多嘢食，包括炒菜、串燒、荷葉包牛肉、豬扒撈檬，當啲餸菜嚟晒之後，佢哋仲叠住手祈禱，然後先食嘢。」G.E.M.嚟緊星期六（16日）喺紅館開騷，問到佢有冇為keep fit食少啲？白先生話：「冇喎，佢食嘢嗰時都好粗魯，食到『啫啫』聲，夾完一嚿未吞，又夾第二嚿，反而佢男友就幾斯文。」

從白先生提供嘅短片中所見，G.E.M.真係食到唔停口，戴鴨舌帽遮樣嘅G.E.M.，刻意揀坐背住食客嘅座位，白先生話：「因為佢將頂帽拉到好低，見唔到眼，聽到佢把聲先認到。佢哋傾傾吓偈時，G.E.M.定神望住男友放電，個樣含情脈脈咁，擺明好冧條仔，男仔俾佢電到時有啲怕醜神情。」

兩人溝通主要講英文，間中講吓廣東話同日文，唔知係咪男友教緊G.E.M.講日文呢！兩人撐完枱腳後，由Mark負責埋單，G.E.M.戴番口罩才離去。

G.E.M.今日回覆《蘋果》時，心情勁靚，全程笑唔停，佢話：「哈哈哈哈！其實我覺得我都幾開心嗰位讀者居然留意到我哋祈禱，哈哈哈哈！我覺得越南嘢幾健康吖，所以幾啱我呢排準備緊15、16、17號紅館演唱會嘅時候嘅營養所需囉，哈哈哈哈！係呀，希望大家到時大家喺紅館會見到我嘅狀態會好好啦！」