做呢行做得耐就會漸漸明白凡事不要太認真。幫Candidate安排了interview，candidate臨時甩底no show十常八九，又有試過Candidate去面試中途縮沙，熄電話，搞到我同客戶都唔知道佢係咪突然有意外，原來佢去面試嘅勇氣同埋坦誠交代嘅勇氣都冇。有時我哋好似教仔女咁樣，見工之前千叮萬囑，希望Candidate順利去面試；真係到有Offer的時候，又要語重心長同Candidate客觀分析利與弊；返工嗰日，又要同佢講啲鼓勵性說話，希望佢唔好返返吓工就辭職。古時有養兒一百歲長憂九十九，宜家有Place can三個月，長憂三個月。梗係啦，中間如果甩咗，我哋要免費再提供一個Candidate俾客戶，如果搵唔到，Commission都冇。

初入行時甩Candidate甩得多，但係都唔夠呢位「真誠姐」Michelle咁令我印象深刻，呢幾年我都會記得佢。話說當時我幫Michelle安排了一個Fashion Retail嘅Marketing Manager面試，其實將佢嘅Profile比客戶之前，我都有同佢飲過咖啡，順便同佢介紹呢間公司。

同工作嘅背景資料，當時佢表現得好有興趣，為咗穩陣起見，我都要求佢返屋企做少少資料蒐集再答覆我肯唔肯去試呢間公司。最後得到Michelle的首肯，我將她的Profile給了客戶，一如所料，客戶很喜歡她的背景，記得當時是星期五，客戶要求星期一和Michelle面試。因為她已經半年冇上班，所以我想盡快幫她投入返個市場。於是我致電給Michelle。

久保：「好消息！我幫妳約咗上次我同你講個客星期一去面試。」

Michelle：「好喎，唔該晒！但係星期一我唔得，我請咗個風水師傅過嚟我屋企幫我擺個陣，希望催旺吓啲事業運。你可唔可以幫我同個客講星期三上午。」

如是者我同個客講Michelle今日臨時屋企有事要改星期三。到星期三朝早七點，Michelle WhatsApp我話屋企隻龜唔舒服要帶隻龜去睇獸醫，睇下可唔可以將Interview改到去下晝。我打俾個客改下晝，經驗話比我知件事唔係好穩陣，所以中午都打個電話俾Michelle，如我所料又要改，佢同我講隻龜要做手術想取消下晝嘅面試。

我再一次同客戶講一個美麗嘅謊言，話Michelle真係今日去唔到因為佢病了，客戶有少少嬲，但係都理解Michelle嘅難處，所以改到去星期五。星期三同星期四我都好驚，好驚Michelle佢又有啲新理由去甩底，所以我都千叮萬囑同佢講星期五準時去見工，而佢都同我講：「我一定會準時去見工。」

星期五早上六點收到Michelle的WhatsApp，內容大致是：「Good Morning久保。Sorry 這份工我不考慮了，我剛剛上網查過這公司有問題，interviewee comments也不太好。不好意思。Please accept my sincere apology。」真誠姐嘅稱號由此得來。呢一刻我真係唔知道用咩理由去同個客講。面對呢種Candidate，咁自私去利用人哋，仲要晨咁早嘈醒我，我決定將佢Blacklist。一個月之後，真誠姐搵返我，同我講經過深思熟慮同埋做過Research，都決定要去試一試呢間公司，叫我即刻同佢安排第二日去面試。

「Fool me once, shame on you. Fool me twice, shame on me. Michelle，機會係唔等人的，當妳上次做咗個決定嗰陣時，幾日之後我已經幫客戶搵到合適的人。」我説。「唔係呀！你真係幫下手啦！我已經好耐冇返工，個風水陣又唔得！我依家隻龜已經好返啦，唔使再照顧佢！我想盡快投入返個市場，你可唔可以幫我聽日安排去見過客？唔好意思呀！」Michelle説。

「Michelle妳唔好唔好意思啊，其實係我唔好意思先啱，我真係幫唔到妳，希望妳接受我真誠的道歉。」

文：久保
人稱「全職獵人」獵頭界紅人，見盡獵場光怪陸離，商場奇聞軼事。
https://www.facebook.com/fulltimeheadhunter/

investMAN
For People of Style & Substance
掌握理財智慧 感受生活品味
http://facebook.com/investMAN.hk