英聯邦議會聯合會英國分會，嚟緊會舉辦英國議會模式政府帳目委員會暨首屆英聯邦政府帳委會聯合會座談會，互相分享審計政府開支嘅經驗。立法會嘅帳委會都會獲邀，不過委員名額只得兩個，唔知委員間會唔會爭崩頭？

座談會喺12月4至7號舉行，名額係兩位帳委會委員加一位秘書處職員。原來帳委會已經決定派主席石禮謙同埋委員陳淑莊赴會，開支方面，每位議員住宿8,200多啲、伙食連雜項就每位6,500左右；機票方面，坐商務就每位來回46,000、坐特選經濟就每位18,000、坐經濟就每位10,000。

八方覺得去吓都好㗎，學習吓人哋監察政府開支嘅經驗，不過更加需要呢方面資訊嘅，怕且係傳統建制派議員噃！