美國道瓊斯工業平均指數舊年勁升超過一成六，係3年來首次錄得雙位數字升幅，反映藍籌股走勢強勁，但依然「跑輸」細價股。

siso喺《MSN討論區》問：「股市升跌，會影響退休金嘅投資回報，究竟投資組合應該買多啲藍籌股，定係中小型股份？」
unexplained認為，任何投資組合都應該多元化，裏面應該有大價、中價、細價股，仲要有國際性嘅投資項目、房地產投資、債券等；至於投資項目點樣分布，就要視乎個人年齡，同埋可接受嘅風險程度而定。
Ed_B講：「過去4至5年，細價同中價股跑贏大價股。我就比較鍾意中價股，貪佢增長可觀，而且比較穩陣。」
FinanceMike話：「資料顯示，喺任何20年，細價股通常跑贏大價股。由1926年起，細價股每年平均有12.1%回報，好過大價股嘅10.2%。根據投資網站thebullandbear.com嘅資料，當整體市況良好時，例如喺50、80同90年代，大價股通常跑贏細價股；但當市況一般，譬如30、40、60同70年代，細價股就多數會跑贏大價股。」

不過，JohnsonIllington投資總監約翰遜認為，股民今年更懂得居安思危，部份資金可能由細價股，流向業務較穩陣兼派息較高嘅大價股。
美國羅素2000小型股指數喺06年大漲17%，稍勝升16.29%嘅道指，但差距明顯細過對上幾年。